內衣美式足球9月開鑼

【商台互動國際組】有人話男人最中意嘅唔係睇波就係睇美女，而相信以下依則消息會係唔少男士嘅福音：美國嘅內衣盃美式足球聯賽將於今年正式展開，10支由性感辣妹組成嘅女子球隊將會喺9月開始，進行為期20場嘅美式足球比賽，喺球場上展開激烈競技。
有睇開美式足球賽事嘅球迷應該都會知道，以往喺超級盃比賽嘅中場時段，都可以睇到一班「內衣足球聯盟」（LINGERIE FOOTBALL LEAGUE ，LFL）女性球員嘅性感競技，身材火辣嘅美女穿上性感清涼三點式戰衣，喺球場上使出渾身解數、落力搶攻，吸引到咗唔少男性觀眾。

以往嘅比賽似係餘興表演多於正式比賽，不過最近內衣足球聯盟透露，佢哋嚟緊打算將球隊擴大為10支，並計畫會喺9月正式展開比賽。聯盟指，佢哋嘅 女球員唔淨止識得喺球場「show」身材、賣弄風騷，一眾女球員「睇得」之餘，其實都相當之「打得」，大部分都有運動功底，屆時佢哋會出盡全力參與球賽， 為觀眾帶嚟一場「真正」而刺激嘅比賽。

喺日前嘅隊員募集活動中，已經率先吸引咗60幾名女士爭相報名，預料屆時又會再掀起一股熱潮。據了解，女球員嘅人工亦相當可觀，年薪可達30幾萬港幣！